عفريت والعمدة
لكويت عاشت أجواء نارية بهالبطولة اللي الكل كان ينتظرها ! 🔥
من أول يوم، كان الملعب مليان حماس وطاقة، والعيون كلها على المات، تشوف أقوى المقاتلين من كل مكان، جايين يتحدّون نفسهم قبل لا يتحدّون خصومهم.
أكثر من ألف لاعب شاركوا، من فئات مختلفة، وكل نزال كان قصة بحد ذاته — عرق، تعب، تكتيك، وروح قتالية ما تنوصف!
الحدث ما كان بس بطولة، كان عرس للجوجيتسو بكل معنى الكلمة. التنظيم كان احترافي، الجمهور متفاعل، والجو العام يعكس شلون الكويت صارت اليوم من الدول اللي قاعدة تبرز بقوة في عالم الفنون القتالية
نتكلم عن فئة البالغين –
ملخص نزالات المبتدئين
بتكلم عن بعض الفايتات اللي شهدتها
اولا : حامد الرويح
يمكن اللي يتابعون رياضة الجوجيتسو بالكويت عارفينه ما شاء الله عليه من يومه صغير اهو و اخوانه وحاليا صعد لي فئة البالغين ، اخر فايت له بالبطولة واللي اخذ فيه الذهبية كان فايت دموي متعب لي اخر لحظة ، لا اعلم شخصيا هل كان قاط وزن قبل البطولة ام كان اساسا تعبان لكن كان بنص الفايت يقول حق ابوه انه ما يقدر يكمل وابوه كان يشجعه ويحثه انه يستمر من على المدرجات (كان منظر جميل الصراحة) وبعد الفايت اللي لعب فيه لي اخر ثانية بروح قتالية الاغلب ما يقدر عليها خذوه الاسعاف على حنب (اتوقع جفاف) وحصد الذهبية بذراعه .
ثانيا : الحصان الاسود
بالنسبة لي الحصان الاسود بهالفئة كان احمد الشبال
بكلمة وحدة : واو
تعرف لما تشوف فلم روكي ، الرياضي اللي ما تتوقع انه يفوز لكنه يغلب كل التوقعات ، كان هذا احمد ، قدر يفوز على اللي بالظاهر كانو اقوى منه واقدم منه ، الريال عنده قلب ، اتوقع له مستقبل كبير بهالرياضة .
نزالات فئة المتوسط
شهدت الفئة هذي نزالات قوية ومن ابرزها كان
ВEKZAT KAPASHOV
من كازاخستان ، لاعب جدا مرعب والحلو بطريقة لعبه انه دامج بين الجوجيتسو والجودو مع القليل من المصارعة .
المحترفين
هنا تستمر الاساطير وتحطم الخرافات ، لكن لابد ان ابدي مع الاسطورة .
العمدة
عماد السميط ، بالنسبة لي خاض افضل نزال بفئة المحترفين ، كانت النتيجة ضدة ٣-٢ لكن باخر ٥ ثواني قدر يقلب النتيجة ٤-٣ لصالحه ، بلاش اتكلم فيديو الفايت موجود بالاسفل، شوف واحكم .
ثانيا حسام قشوع ، هالرجل معنى للتحدي ، اعشق المدرب اللي يشارك بالبطولات ومايخاف ، قدر ياخذ
knee bar
بطريقة اتوقع اغلبنا الى الان مو فاهمها ، سنين من الخبرة .
العفريت
يحيى اليحيوح كان بطل البطولة ، اخذ اهتمام من المحترفين والمنظمين وكل الموجودين ، علما انه كان يلعب بفئة المبتدئين .
لكن لما لعب ب وزن الابسلوت هني كانت تتجلى متعة مشاهدة الجوجيتسو و بالذات القرابلينغ بال نو غي ، الفايت الاخير قدر يفوز فيه ب خطآ كبير للاعب الثاني ، لكن اتوقع حتى لو استمر اللاعب الثاني بدون الخطآ اللي قام فيه كان اليحيوح راح يفوز ، الثاني كان معتمد على ثقله ووزنه واليحيوح على تكنيكه وسرعته ، ارجح فوز التكنيك .